رکھ اپنے دل کو بر سر پیکار کار کار
بغیر عنوان.......!!!
رکھ اپنے دل کو بر سر پیکار کار کار
بیمارئ الم کو اے بیمار مار مار
ہوتا رہے گا نعرۂ حق و صفا بلند
چڑھتے رہیں گے صاحب کردار دار دار
مجھ کو قسم ہے آپ کے عہد وصال کی
روؤں جو ہوکر آپ سے بیزار زار زار
شاہوں سے کہدو مانگ لیں چوکھٹ پہ آکے بھیک
کھلتا نہیں فقیر کا دربار بار بار
وہ آنکھ کس سے محو تکلم ہے سمجھا کون
کہنے کو انجمن میں ہے ہشیار یار یار
دور زوال خاک نشینوں سے ہے شروع
ہونی ہے شاہزادوں کی دستار تار تار
احساس کی نگاہ سے دیکھ اے سفیر ظلم
روتی ہے آنسو خون کے تلوار وار وار
کوئی مرا سفینۂ ہستی اچھال دے
گھیرے ہوئے ہے درد کی منجدھار دھار دھار
جو کچھ بھی عزتیں ہیں ظفر میکدے میں ہیں
پھرتے ہیں شاہراہوں پہ میخوار خوار خوار
(((از قلم: محمد ظفر القادری ظفر مرکزی)))
منجانب: قمر رضا مرکزی
